ठाकुरबाबा, बर्दिया । ठाकुरबाबा नगरपालिकाले अनुदानको रासायनिक मल वितरणलाई प्रभावकारी बनाउन कृषकहरुको अनलाइन सूचीकरण गर्ने भएको छ । पछिल्लो समय देशैभरीका किसानहरुले रासायनिक मलको अभाव भोगीरहँदा ठाकुरबाबा नगरपालिकाले आफ्ना पालिकाका कृषकहरूलाई सहजरूपमा मल प्राप्त गर्न सक्ने वातावरण सिर्जना गर्न कृषकहरुको अनलाइन सूचीकरण प्रक्रिया अगाडि बढाउन लागेको हो ।
मल वितरणलाई व्यवस्थित र पारदर्शी बनाउन मल वितरणको सम्पूर्ण विवरण अनिवार्य रूपमा अनलाइनमा प्रविष्ट गर्ने ब्यवस्था लागू गर्न लागिएको नगरप्रमुख तिलकराम लम्सालले बताउनुभयो । कृषकहरुको जग्गाको क्षेत्रफल अनुसार उपलब्ध मलको परिमाणलाई भाग लगाएर सबै किसानहरुलाई समान वितरण प्रणाली मार्फत मल वितरण गरिने उहाँले बताउनुभयो । नगरप्रमुख लम्सालले भन्नुभयो "यसबाट एक क्विन्टल मलमा एक किलो परे पनि वा पाँच किलो परे पनि, किसानले आफ्नो जग्गाको क्षेत्रफल अनुसार समानुपातिक रूपमा मल पाउने सुनिश्चितता हुनेछ ।"
अनलाइन सूचीकरण र जग्गाको क्षेत्रफलका आधारमा समानुपातिक वितरण प्रणाली लागु भएपछि कृषकहरुलाई मल खरिदको लागि घण्टौ समय लाइनमा बस्न नपर्ने उपप्रमुख बीनाकुमारी भट्टराईले बताउनुभयो । अबको प्रणालीमा जग्गाको क्षेत्रफल अनुसार सबै कृषकहरुले समानुपातिक रूपमा मल पाउनेछन् । सहकारी संस्थाहरू र नगरपालिका मिलेर सूचीकरण कार्य छिटो सम्पन्न गरी यो शिघ्ररुपमा नयाँ प्रणाली कार्यान्वयनमा ल्याउने उपप्रमुख भट्टराईले जानकारी दिनुभयो ।
ठाकुरबाबा नगरपालिका, कृषि उपशाखाको आयोजनामा अनुदानको मल वितरणको समस्या तथा किसान सुचीकृतबारे सहकारी संस्थाका प्रतिनिधि, किसान, बडघर लगायत सरोकारवालाहरुसंग गरिएको अन्तरक्रिया कार्यक्रममा मलको विक्री, व्यवस्थापनमा देखिएका समस्या र सोको समाधान गर्न अपनाउन सकिने क्रियाकलापहरुमा छलफल गरिएको ठाकुरबाबा नगरपालिका, कृषि उपशाखा प्रमुख ध्रुबराज बमले बताउनुभयो । अन्तरक्रियामा मल वितरणमा देखिएका बेथितिहरूको समाधान गर्दै वितरण प्रणालीलाई पूर्णरूपमा पारदर्शी बनाउने विषयमा बृहत् छलफल भएको समेत उहाँले जानकारी दिनुभयो ।
कार्यक्रममा सहभागी भएका कृषक, मल वितरणको जिम्मा पाएका सहकारी संस्थाका प्रतिनिधि, जनप्रतिनिधि र कृषि प्राविधिकहरुको सहभागिता रहेको थियो । अन्तरक्रिया कार्यक्रममा आगामी एक हप्ताभित्र मल लिन चाहने किसानहरूको कार्यविधि अनुसार सूचीकरण गरिने र मल पासबुक वितरण कार्यलाई पूर्णता दिइने निर्णय गरिएको छ । ठाकुरबाबा नगरपालिकाले विगत २ वर्ष अगाडीदेखि मल वितरणलाई व्यवस्थित बनाउन कृषक पासबुक लागू गरेको छ ।
