यज्ञप्रसाद सापकोटा
बर्दिया ।
शशस्त्र द्वन्द्वको कथामा आधारित भएर मञ्चन गरिएको नाटक हरि हजुरबा लिएर नाटकका निर्देशक नाजिर हुसेन र कलाकार बिजय बरालको टोली बर्दिया पुगेको छ ।
बर्दियाको गुलरियामा आज मञ्चन गरिने नाटक मण्डला थिएटरको प्रस्तुती हो । बिहिबार मञ्चन गर्ने भनिएको नाटक प्राविधिक समस्या आएपछि शुक्रबार(आज)का लागि सारिएको छ । नाटक बिहिबार गुलरियाको राधाकृष्ण चोकमा मञ्चन गर्ने प्रयास गरिएको थियो । करिब पाँच सय दर्शकले चोक खचाखच भरिएपनि साउण्ड सिस्टममा भएको समस्या समाधान नभएपछि नाटक मञ्चन गर्न नसकिएको नाटकका निर्देशक हुसेनले बताउनु भयो । संवेदनशिल नाटक भएको हुनाले साउण्ड सिस्टम नहुँदा देखाउन नसकिएको उहाँले बताउनु भयो । उहाँले दर्शकहरू समक्ष क्षमा माग्दै आज नाटक मञ्चन गरिने बताउनु भएको छ ।
नाटकमा नाटकका लेखक तथा निर्देशक नाजिर हुसेनले शशस्त्र द्वन्द्वको क्रममा आँफै भोगेको र देखेको विषय बस्तुमा आधारित कथा रहेको बताउनु भयो । शशस्त्रद्वन्द्वको समयमा बेपत्ता पारिएका व्यक्तीको पर्खाइ र पिडालाई समेटेर मञ्चन गरिएको नाटक त्यतीबेलाको अत्यन्त प्रभावित जिल्ला बर्दियामा देखाउन पाउँदा खुसी लागेको निर्देशक हुसेनले बताउनु भयो । पीडित परिवारसँग पिडा साटा साट गर्ने मौका समेत मिलेको उहाँले बताउनु भयो । नाटकको विषयबस्तुमा आधारित रहेको द्वन्द्वपीडित परिवार र बर्दियाका नागरिक समाजहरूसँग अन्तरसंवाद कार्यक्रम पनि गरिएको छ ।
नाटकले पीडितपरिवारलाई आफ्ना कथा आँफै लेख्न अभिप्रेरित गर्ने बेपत्ता पारिएको व्यक्तीकी छोरी कविता वलीले बताउनु भयो । उहाँले पीडित परिवारलाई आफ्नो पिडा भुलाउन मद्दत गर्ने बताउनु भयो । कथाको विषयवस्तुको बारेमा जानकारी भएपछि कथा छिट्टै हेरौँ जस्तो लागेको पीडित परिवार सुभद्रा चौधरीले बताउनु भयो ।
हरि हजुरबा मण्डला थिएटरमा मञ्चन भएको नाटकमा सबै भन्दा बढी कमाउने नाटक हो । मण्डला थिएटरमा एक महिना सम्म मञ्चन गर्दा समेत दर्शकहरू खचाखच भरिएका थिए । नाटकमा सविना थापा, रोहित शाह, सुजना पाण्डे, मनिषराज पाण्डे, रिसु राउतको पनि अभिनय छ । लामो समय चलचित्रमा काम गरिरहेका कलाकारद्वय हुसेन र बराल व्यस्त समय भएपनि मोफसलमा नाटक मञ्चन गर्न बर्दिया आईपुगेका हुन् । शुक्रबार गुलरियामा र शनिबार बर्दिया कै मानपुरटपरामा नाटक मञ्चन गर्ने योजना रहेको छ ।
फोटो ः बिहिबार गुलरियामा हरि हजुरबा नाटक देखाउन प्रयास गर्दै ।