भुरीगाउँ (ठाकुरबाबा) । लुम्बिनी प्रदेशस्तरीय बाल अधिकार समितिको सदस्य पदमा बर्दिया भुरीगाउँ निवासी गोपाल निरौला मनोनित हुनुभएको छ । प्रदेशमा बालबालिकाको हक, हित, संरक्षण र सम्वद्र्धन गर्ने उद्देश्यले ठाकुरबाबा नगरपालिका–१, भुरीगाउँ निवासी गोपाल निरौलालाई सदस्य पदमा मनोनयन गरिएको लुम्बिनी प्रदेश सामाजिक विकास मन्त्रालयले जनाएको छ ।
बालबालिकाको अधिकार तथा हक हितको संरक्षण र सम्वद्र्धन गर्ने सम्बन्धमा आवश्यक नीति निर्माण गरी प्रदेश सरकारलाई सिफारिस गर्ने प्रयोजनार्थ बालबालिकाको हक अधिकार संरक्षण सम्बन्धमा व्यवस्था गर्न बनेको ऐन, २०७६ को दफा ४०(ट) बमोजिम प्रदेशस्तरीय बाल अधिकार समितिको सदस्य पदमा निरौलालाई मनोनित गरिएको लुम्बिनी प्रदेशका सामाजिक विकास मन्त्री जन्मजय तिमिल्सिनाले जानकारी दिनुभयो ।
मनोनयनपछि प्रतिक्रिया दिँदै नवनियुक्त सदस्य निरौलाले बाल अधिकारको प्रभावकारी कार्यान्वयनमा आफ्नो ध्यान केन्द्रित गर्ने सङ्कल्प व्यक्त गर्नुभएको छ । नेपालले संविधान र अन्तर्राष्ट्रिय महासन्धिबाट बालअधिकारलाई मौलिक हक मानेको भएपनि असमानता, लैङ्गिक विभेद, बालविवाह, बालश्रम र शिक्षा र स्वास्थ्यमा समान पहुँच हुन नसक्नु नै बाल अधिकार हननका मुख्य कारणहरू भएको निरौलाले बताउनुभयो ।
खबर सन्देशसंग कुरागर्दै निरौलाले भन्नुभयो, "अभिव्यक्ति, सहभागिता, शिक्षा, स्वास्थ्य, सुरक्षा र मनोरञ्जनका आधारभूत अधिकार अझै धेरै बालबालिकाले पूर्ण रूपमा पाउन सकेका छैनन् । बालमैत्री समाजका लागि अभिभावक, विद्यालय, समाज र सरकार सबैको समान जिम्मेवारी आवश्यक रहेको छ ।" उहाँले शिक्षा प्रणालीलाई घोकन्ते होइन, सिकाइ केन्द्रित, व्यवहारिक र मूल्य आधारित बनाउनु पर्नेमा समेत जोड दिनुभयो । नवनियुक्त सदस्य निरौलाले कागजी प्रतिबद्धता होइन, व्यवहारमै बाल अधिकार कार्यान्वयन गर्ने समय आएको बताउँदै आफ्नो कार्यकालभरि भेदभाव रहित, शिक्षित, स्वास्थ्य र आत्मविश्वासपूर्ण बालपीढी निर्माणको विषयमा पैरवी गर्ने बताउनुभयो ।
सामाजिक विकास मन्त्रालयले मनोनित सदस्य निरौलाको सक्रियताले प्रदेशमा बालमैत्री नीति निर्माण र कार्यान्वयनमा सहयोग पुग्ने विश्वास व्यक्त गरेको छ । निरौला लामो समयदेखि सामाजिक कार्यमा क्रियाशिल हुनुहुन्छ । उहाँ विकास प्रेमी युवा समूह, बर्दियाको अध्यक्ष समेत हुनुहुन्छ ।
