गुलरिया ।
बर्दियामा मोटरसाइकल गोरुगाडामा ठोकिँदा एक जनाको मृत्यु भएको छ भने दुई जना घाइते भएका छन् । दुर्घटनामा परी मृत्यु हुनेमा कैलाली भजनी नगरपालिका वडा नं १ की ३० वार्षीया सपना सुनार हुनुहुन्छ ।
मोटरसाइकल चालक मृतकका श्रीमान मोटरसाइकल चालक ३६ वर्षीय चञ्चल सुनार र छोरी ५ वर्षीया कृष्ण सुनार घाइते भएको जिल्ला प्रहरी कार्यालयले जनाएको छ । घाइतेको उपचारको लागि नेपालगञ्ज लगिएको छ ।
गुलरिया–नेपालगन्ज सडक खण्डको गुलरिया–११ मा गएराती मोटरसाइकल गोरुगाडामा ठोकिएको थियो । एक्कासी गोरुगाडामा ठोकिँदा सपनाको टाउकोमा गम्भीर चोट लागेको थियो । उहाँको उपचारको क्रममा बर्दिया अस्पतालमा मृत्यु भएको थियो । गोरुगाडा चालक गुलरिया नगरपालिका–५ बालापुरका ४५ वर्षीय कर्ण थारूलाई प्रहरीले नियन्त्रणमा लिई जिल्ला प्रहरी कार्यालयमा राखेको प्रहरी नायव उपरिक्षक देवेन्द्र कुमार मल्लले जानकारी गराउनु भयो ।
लाइट र रिफ्ल्याक्टर नहुँने हुँदा गोरुगाडा अरु सवारी साधनका लागि जोखिमपुर्ण हुने गर्दछ । तराइको क्षेत्रमा मोटरसाइकल लगाएतका सावरीसाधन दुर्घटना हुने कारण मध्ये गोरुगाडा एक हो ।