खबरसन्देश स‌वाददाता ।
बर्दियामा सामुदायिक वनमा घाँस काट्न गएको समयमा चितुवाले आक्रमण गर्दा एक महिलाको मृत्यु भएको छ । बर्दियाको गुलरिया नगरपालिका वडा नं १२ टडुवामा रहेको नेपाल केदुवाई सामुदायिक वनमा घाँस काट्दै गर्दा चितुवाले आक्रमण गरेपछि सोही ठाउँकी २८ बर्षिय कविता तामाङ्गको मृत्यु भएको हो ।

घर नजिकैको जंगलमा घाँस काट्न जाने क्रममा तामाङ्गलाई चितुवाले आक्रमण गरेको हो । चितुवाको आक्रमण गरेपश्चात् सँगै गएका साथीहरूले स्थानीयबासीलाई खबर गरेका थिए । स्थानीयबासीले हो हल्ला गरेपछि चितुवाले छोडेर भागेको थियो । तामाङ्गको घटनास्थल मै मृत्यु भएको डिभिजन वन कार्यालय बर्दियाका सुचना अधिकारी रामकुमार चौधरीले बताउनु भयो । उहाँले बिहान जंगलमा चार जनाको समुहमा घाँस काट्न गएको समयमा चितुवाले आक्रमण गरेको बताउनु भयो । मृतक महिलाको घरमा तीन बर्षको बच्चा रहेको स्थानीयबासीले बताएका छन् । पटक पटक चितुवाको आक्रमणबाट मानिसको मृत्यु हुन थालेपछि स्थानीयबासी त्रसित भएका छन् । गत साउन ३१ गते सो स्थानबाट नजिक रहेको गुलरिया नगरपालिका वडा नं ११ भैँसाहीमा चितुवाले आक्रमण गदा ४५ वर्षिय जगतरानी थारूको मृत्यु भएको थियो ।

चितुवा नियन्त्रणका लागि स्थानीबासीले माग गरेका छन् । एक महिनाको अन्तरालमा नजिकै दुई जनाको मृत्यु हुँदा पनि सम्बन्धीत निकायले चितुवा नियन्त्रणमा लिन नसकेको स्थानीयले बताएका छन् ।

एक महिना अघि देखि चितुवा नियन्त्रणका लागि क्यामेरा र चार ओटा पासो राखिएको सुचना अधिकारी चैेधरीले बताउनु भयो । उहाँले चितुवा नियन्त्रणका लागि लगातार प्रयास गरेपनि पासोमा चितुवा नपरेको बताउनु भयो । घटना पछि चितुवा नियन्त्रणका लागि डिभिजन वन कार्यालय, बर्दिया राष्ट्रिय निकुञ्ज, राष्ट्रिय प्रकृति संरक्षण कोष र सुरक्षाकर्मीको टोली घटनास्थल तर्फ हिँडेको उहाँले बताउनु भयो ।